Monon Behavior


Vai ai contenuti

Capitan Harlock

CAPITAN HARLOCK
el toga melanico

El toga melanico mascotte del Monon Behavior Research Department se ga montà la testa. Desso el ga dito "miau", che vol dir che el vol una pagina tuta per lui. Alora ecola :)

Storia del toga melanico

Prequel: 2 giorni prima, gavemo i testimoni, Diego Manna ghe disi a Erika Ronchin: "el prossimo gato, se gaverò, me piasessi ssai che sia nero. E trovà tipo come nela publicità barilla de 20 ani fa".

Capitan Harlock nassi, se stima, el 25 giugno 2007. Fin de picio el xe ssai ma ssai moneto, tanto moneto che una note el se perdi. O forsi la mamica, anzi, la mamicia, lo abandona perchè no la pol più de lui. Insoma fato stà che sto stropoleto nero se ritrova de note a pianzer tuto solo sconto drio quel mureto fora del giardin de una casa a Opcine. Destin vol che quel giardin apartien al Monon Behavior Research Department.
E insoma el diretor del'importante Centro Internazionale de Ricerche, Diego Manna, tornando casa de note, senti sto bagarospo che miagola e va veder cossa xe. No se vedi niente, el xe nero int'el nero. Se senti solo qualcossa che sufia. E bon ah, alora el mulo decidi de andar a dormir e sveiarse co' riva el ciaro, che magari se lo vedi un poco meo. Intanto la sniesola pelosa continua a pianzer tuta la note, ma la mamicia no torna.
Ale 5 de matina (e imaginè el sforzo per sveiarse ale 5 de matina!!!) el mulo va a veder come xe fato sto stupidin. E xe amor a prima vista. Alora lo ciol pe'l copin, e el se lo porta in giardin. A metà percorso, pensando che ormai se xe amici, el decidi de cambiar presa per farlo star un bic più comodo. El toga però vol la mamicia, el se ribela, el sgrafa, el rosiga e el scampa zigando, riconquistando la stessa roccaforte drio quel mureto da cui el pianzeva prima.
"E bon ah, resta là, cossa te vol che te digo, mi alora torno dormir".
Xe matina, ma xe scuro come se saria note. Temporal, piova e grandine. Sto picio toga melanico ga bastanza sfiga.
Ale 10, el mulo se sveia. E senti che la sniesola nera pianzi ancora drio quel mureto. Sto giro però el xe tuto slavazà, infredolì e tremolante. Per no farsela cazar de novo, no lo ciapa pe'l copin, ma l'avicina le mani al toga e el vedi cossa el fa. La sniesola melanica xe un poco indecisa, ma ala fine ghe par che le man xe sute e calde e alora forsi merita avicinarse e farse cocolar, e el taca a far le fusa.
El se fa portar in casa, el magna un pochetin de late e salame, el se indormenza e per un'ora no lo sveia gnanca le canonade :D
Dopo de quela volta, el diventa praticamente un gato cagnolin. El stà sempre dove che xe le persone, co' riva qualchidun de novo el ghe cori incontro e el vol sempre zogar. El se specializa in aguati. Te va fora dela porta: primo aguato, poi el scampa e el se nascondi drio la prima rampa de scale. Te scendi la rampa, secondo aguato, poi el scampa e el se nascondi drio la seconda rampa de scale. Te scendi la seconda, terzo aguato. Questo xe el suo famoso aguato triplo. Oviamente te ga de far finta de ciapar paura e sopratuto de no vederlo mentre che el se rinascondi 2 volte.
Ma la sua vitima preferita xe (iera) la cagneta Mitzy. Capitan Harlock ghe coreva drio e ghe saltava oltre tipo cavalina. Mitzy fazeva giusto in tempo a girarse per veder cossa nasseva, ma intanto lui iera za oltre che scampava dal'altra parte :D
Altri aguati che ghe piasi ssai far xe quei scondendose drio la porta, sptando che rivi qualchidun per saltar, darghe una papuza int'el naso e scampar.
Per le prime setimane de istanza a Opcine, el nome che più ghe se adiceva iera "stupidin". poi el xe stà promosso a "stronzetto". Poi a "ou fenomeno". E infine, co el ga superà el test, el xe stà promosso a capitan, "Capitan Harlock", per i a-mici Harlokkio.
Bon, e desso un pochi de video e el suo progeto più importante, l'etogramma dei felini melanici!
E per chi ancora no lo ga, eco el culendario de Capitan Harlock 2012!

Capitan Harlock a due mesi

Capitan Harlock protagonista in "Quel giorno de gati"

Capitan Harlock e la cavalina fata per soto

Capitan Harlock e gli agguati

Capitan Harlock perdi a "Rocket Arse" per colpa dela cera

Capitan Harlock e l'alenamento de ciapamosche


Torna ai contenuti | Torna al menu